الفطام – طريقة الفطام الصحيحية ومشاكل الفطام Weaning

الفطام weaning حوارنا اليوم سيكون عن مشكلة تواجه الأمهات الجدد لو انتى ام لأول مرة استنى كلامنا هيفيدك لو لسة حامل لأول مرة اسمعينا لو انسة على وش جواز برضو كلامنا مش هيخسر لو انت ام للمرة التاينة او التالتة اسمعى يمكن تكونى بتغلطى وانت مش واخدة بالك

ايه هو الفطام هو تقديم اغذية نصف صلبة وصلبة بجانب اللبن يعنى مش اغذية لوحدها احنا بنقول مع اللبن عشان محدش يرجع يقول انا بطلت الرضاعة واديته فراخ هنبدأ امتى ياماما ؟ سؤال كل بنت بتساله لمامتها او حماتها فى اول طفل انا اقولك ياستى هنبدأ فى الشهر السادس فى ناس بتقول الرابع بس ده مش مستحب اوعى تفطمى العيل قبل الرابع هتكون لسة الأنزيمات بتاعته مش ناضجة بالدرجة الكافية وكمان فى اول 4 شهور اللبن كفاية قوى على الطفل ماشى ؟

فى ناس بتقول نأخر الفطام شوية احنا ممكن نأخره فى الجو الحر ولو الطفل عيان شوية او بيسنن هتكمل عملية الفطام امتى بقى ولا هنفضل ندى الطفل لبن واكل ؟ لأ طبعا هنكمل العملية عند سن سنة ونص او سنتين هو احنا ليه اصلا بنفطم الطفل ؟؟ اولا لأن العيل مش هيقدر يشرب اكتر من لتر لبن فى اليوم وجسمه محتاج حجات تانية زى الحديد وفيتامين د وسى وكمان عشان نمرن الجهاز الهضمى للطفل ونوفر كل احتياجات الطفل.

هو ممكن الطفل يحصله مضاعفات من الفطام يا دكتور ؟ اقولك ممكن يحصل للطفل شوية حساسية من انواع معينة من الأكل زى البيض والسمك مثلا ممكن برضو يحصل سوء تغذية ودى بقى مهمتك انك تظبطى كمية الأكل ونوعيته شوية مغص ممكن كمان لو انتى زودتى السكر اسهال لو قدمتى للطفل اكل مش نضيف وساعتها انتى الى غلطانة.

طب والفطام ده بقى بيتعمل ازاى ؟. اولا لازم كل حاجة بالتدريج مفيش حاجة بتيجى مرة واحدة يعنى نقدم فى كل مرة نوع واحد من الأكل وبكمية صغيرة ممنوع منعا باتا المعلبات الأكل ممكن تطحنيه او تهرسيه عشان يبقى اسهل للطفل خلى فى اسلوب يشد الطفل لتجربة الأكل يعنى اطباق ملونة معالق بتنور اى حاجة تشد الطفل الطفل ممكن يتف الأكل مش معناه انه ما بيحبوش هو بس مستغرب وبيحاول يستطعم ماشى ؟

نعمل بقى جدول للأكلات بتاعة الفطام الشهر السادس ممكن مهلبية نشا بمية او بسكويت الشهر السابع رز فاكهة وخضار مهروسين الشهر التامن شربة خضار بمية الشهر التاسع شوربة خضار معمولة فى شوربة لحمة وممكن فول كمان الشهر العاشر ممكن حتة كبدة او سمك فى الشهر الحادى عشر ممكن فراخ وارانب فى الشهر الثانى عشر ممكن لحمة حمرة بعد السنة الأولى بقى ممكن نقدم البيض واللبن الحليب اى سؤال يا امهات المستقبل ؟؟؟؟؟؟؟ سلاااااااااااااااااااام

اظهر المزيد

مقالات ذات صلة

أضف تعليق

إغلاق